അറിയാം പോസ്റ്റ് ഓഫീസിന്റെ മാസം തോറുമുള്ള വരുമാനപദ്ധതി;പ്രതിമാസം 9,250 രൂപപെൻഷൻ

കൊച്ചി: കേന്ദ്രസർക്കാരിന്റെ പിന്തുണയോട് കൂടിയ, പോസ്റ്റ് ഓഫീസിന്റെ ലഘു സമ്പാദ്യ പദ്ധതികളിൽ ഒന്നാണ് മാസം തോറുമുള്ള വരുമാനം പദ്ധതി. നിക്ഷേപ തുകയുടെ പലിശ പ്രതിമാസം ലഭിക്കുന്നതാണ് പദ്ധതിയുടെ ആകർഷണം.

കേന്ദ്രസർക്കാരിന്റെ പിന്തുണയുള്ളത് കൊണ്ട് നിക്ഷേപം സുരക്ഷിതമാണ്. ജോയിന്റ് അക്കൗണ്ടിൽ 15 ലക്ഷം രൂപ വരെ നിക്ഷേപിക്കാൻ സാധിക്കും. ഇത്തരത്തിൽ 15 ലക്ഷം രൂപ വരെ നിക്ഷേപിച്ചാൽ മാസം 9,250 രൂപ വരുമാനം ഉറപ്പാക്കാൻ കഴിയുന്നതാണ് ഈ പദ്ധതിയുടെ പ്രത്യേകത.

അഞ്ചുവർഷമാണ് കാലാവധി. 7.4 ശതമാനം പലിശയാണ് ലഭിക്കുക. ആയിരം രൂപ ഉണ്ടെങ്കിൽ പദ്ധതിയിൽ ചേരാം. സിംഗിൾ അക്കൗണ്ടിൽ പരമാവധി 9 ലക്ഷം വരെ നിക്ഷേപിക്കാം. ജോയിന്റ് അക്കൗണ്ടിൽ പ്രായപൂർത്തിയായ മൂന്ന് പേർക്ക് വരെ ചേരാം. പ്രായപൂർത്തിയാവാത്ത കുട്ടികൾക്ക് വേണ്ടി രക്ഷിതാക്കൾക്കും പദ്ധതിയിൽ ചേരാവുന്നതാണ്.

കുട്ടിക്ക് പത്തുവയസിന് മുകളിൽ പ്രായം വേണം. പലിശ നികുതിവിധേയമാണ്.നിക്ഷേപം നടത്തി ഒരു വർഷത്തിനു ശേഷം 2 ശതമാനം കിഴിവോടെയും മൂന്നു വർഷത്തിനു ശേഷം 1 ശതമാനം കിഴിവോടെയും നിക്ഷേപത്തുക പിൻവലിക്കാവുന്നതാണ്. പലിശ മാസം തോറും റെക്കറിങ് ഡെപ്പോസിറ്റിൽ നിക്ഷേപിച്ചാൽ കാലാവധി ആകുമ്പോൾ നല്ല ഒരു തുക ലഭിക്കും.

നിക്ഷേപം

അഞ്ചുലക്ഷം- പ്രതിമാസം 3,083 രൂപ വരുമാനം

ഒൻപതുലക്ഷം- പ്രതിമാസം 5,550 രൂപ വരുമാനം

15 ലക്ഷം രൂപ- പ്രതിമാസം 9,250 രൂപ വരുമാനം